أسهل قطع مكرمية

المكرمية هي نوع من أنواع الأشغال الفنية اليدوية باستخدام العقد لإنشاء أشكال مختلفة، و تاريخ المكرمية يرجع للقرن الثالث عشر، لإن كان النساجين العرب بيستخدموها لصنع حواف مزخرفة للحجاب أو الشالات، انتشر فن المكرمية في إنجلترا، وبقت هواية سيدات المنازل، لحد ما بقى مفيش أي بيت عصري مفيش فيه أي شكل من أشكال المكرمية إما في الستاير أو مفارش الترابيزة ….إلخ.

و أنواع العقد في المكرمية كتير بس أهمهم هي:

1- العقدة المربعة

2- العقدة الملفوفة

3- العقدة المزدوجة أو الدودة

كدة عرفنا ايه هي المكرمية.. ايه هي بقى أسهل قطع المكرمية اللي ممكن ننفذها ؟؟

القطع اللي ننفذها كتير بس أهمهم وأسهلهم هم:

1- مكرمية حائط

تعتبر مكرمية الحائط أشهر أنواع المكرمية على الإطلاق، وهي من أكتر القطع المطلوبة في السوق ومن أسهل القطع اللي ممكن نتعلمها بسهولة. و تعتبر كمان ديكور رائع ومتين وصديق للبيئة ومناسب للاستخدام الداخلي في البيت، بتضيف لمسة فنية لأي الديكور داخلي - سواء في المنزل أو المكتب. والمواد اللي بنستخدمها في صناعة مكرمية الحائط قليلة جدا ومتوفرة في أي مكان بسهولة ورخيصة، وهي حبل قطني ووتد خشبي.

2- شنطة مكرمية

من أكتر القطع اللي ممكن تخليكي متميزة بين زمايلك في الشغل أو صحابك في النادي هي شنطة المكرمية، مش بس عشان شكلها جذاب جداَ وشيك وليها بيرستيج كدا، ده عشان كمان انتي اللي هتنفذيها بإيدك وده اللي ممكن يخليكي متميزة بين الناس. شنطة المكرمية تعتبر من القطع البسيطة جداَ اللي سهل تنفيذها من أي حد مهما كان مستواه. كل اللي انتي محتاجاه عشان تنفذيها هو الخيط وبس.

3- مراية مكرمية

ديكور البيوت دلوقتي مبقاش مميز زي زمان. كان زمان أقدر أخلي أي حد يخش بيتي يفضل فاكره علطول، دلوقتي بقت كل الديكورات شبه بعض ومش مميزة. بس مراية المكرمية تقدر تغير كل ده، لإنها مش بس جميلة جدا وشيك جدا، لا كمان مش منتشرة مع أنها ممكن تغير شكل المكان اللي متعلقة فيه وتخليها أجمل بكتير جدا وتخلي أي حدا يخش البيت يفضل فاكره طول عمره. وكل اللي بنحتاجه عشان ننفذها هو مراية وخيط بس.

وبعد ما عرفت ايه هي أسهل القطع اللي ممكن أتعلمها، دلوقتي انا عايزة أعرف أتعلمها منين ؟؟

بصي يا ست الكل، فيه طرق كتير ممكن نتعلم منها, مش شرط بس تكون أننا نشترك في كورس أو ننزل مكان نتعلم فيه, احنا ممكن نتعلم من البيت عادي, بس أهم حاجة يكون عندنا إرادة و شغف.